أنا عندي مشكلة غريبة شوي، أو يمكن الناس تشوفها بسيطة، بس أنا بالنسبة لي كبيرة وما أقدر أبلعها.
زوجي طلب مني شي مستحيل أوافق عليه… طلب مني أرسم وشم على جسمي باسمه! لا وبعد حدد المكان! يبي اسمه بالإنجليزي على أسفل ظهري… وعلى كتفي من ورا بالعربي… وفراشة تحت سرتي!!!
هو من النوع اللي يحب التاتوهات، جسمه مليان وشوم، وكل فترة يضيف شي جديد، وكلها أوشام كبيرة وواضحة، وبعضها بأسماء بنات! إيه والله، سبع أسماء! ولما سألته من هالبنات؟ قال لي: "أصدقاء قدامى… قصص راحت."
وأنا مو طالبة منه شي، بس هو راح وكتب اسمي على صدره بخط كبير، وقال لي: "الحين دورك… اكتبي اسمي على جسمك، نكون متساويين!"
أنا رفضت، بكل هدوء بالبداية، قلت له: "أنا ما أحب الأوشام، ولا مقتنعة فيها، وبشرتي ما أبي أغيّر فيها شي."
بس هو ما اقتنع، قلبها دراما، صار يقول: "لو كنتِ تحبيني فعلاً، جان ما ترددتي! شوفي كل العشاق بالعالم، يحطون أسامي بعض على أجسامهم…"
قلت له: "حبنا مو لازم يبين بوشم! ممكن يبين بألف طريقة، بالكلمة، بالتصرف، بالاحترام."
بس ما يسمع… كان مصر بشكل يخوف.
المشكلة إنه مو بس مصر، لا… صار يهددني!
قال لي إذا ما سويت اللي يبيه، بيمنعني من أشياء أحبها:
ما أروح شغلي، ولا أزور صديقاتي، ولا أروح النادي، ولا حتى أسافر!
صرت أحس إني محاصرة.
أنا مرة حاولت أهدّي الوضع، كتبت اسمه على جسمي بالحناء… قلت يمكن يرضى، بس يوم شافه… انقلب!
قال لي: "إنتِ تستهزئين فيني؟! أنا أبي شي ما ينمسح… أبيه يظل فيك للأبد، لين تموتين!"
قسم بالله وقتها خفت منه… عيونه كانت غريبة، وكلامه يرعب.
وصل به الحال إنه يقول بيروح يجيب واحد يسويلي الوشم وأنا نايمة!
قالها وهو جاد، مو يمزح.
ما قدرت أسكت، رحت وقلت لأبوي…
أبوي جن جنونه، راح وكلمه وقال له بالحرف: "بنتي مو ماشية تحط ختم عليها… وإذا قربت منها بالغصب، ترى أوديك ورا الشمس."
من ذاك اليوم، زوجي قاطعني.
لا يكلمني، لا ينام معاي، لا يأكل معاي، يرجع آخر الليل وينام، ولا كأني موجودة.
حسيت إنه يعاقبني لأني وقفت بوجهه، ولأني شكوته لأبوي، بس وش كنت بسوي؟ أخليه يخدرني ويحط اسمه على جسمي وأنا نايمة؟
هو يقول إنّي لو كنت أحبه، جان قبلت، بس أنا أقول الحب ما يعني أفقد نفسي وكرامتي عشانه.
قلت له: "أنا ما أفكر أتركك، إلا إذا خنتني، أو ضربتني، أو تزوجت علي، بس حتى لو حبيتك، ما يعني أكتب اسمك على جسمي…"
أنا تعبت نفسياً، ما أعرف هو شفيه؟ هل هو طبيعي؟
هل فعلاً مدمن على الوشم؟ أو يبي يملكني ويطبع اسمه عليّ كأني شي مو إنسانة؟
وش كنتوا بتسوّون لو كنتوا مكاني؟
وش الحل مع شخص يحاول يثبت حبّه بطريقة متعبة ومؤذية؟
أبي أكون معاه… بس مو بهالشكل.
ليست هناك تعليقات:
إرسال تعليق