ترفض الجماع معي لأني مديون!

 

انا تزوجت قبل 11 شهر وقضيت مع زوجتي أيام جميلة، لكني لاحظت تقصيرها معي في الفراش، والله اني بعض الاحيان احس نفسي اعزب، كرهت وضعي وذلي وأنا أترجاها مرات، زوجتي صغيرة عمرها 19 وانا عمري 29، ​اغلب مشاكلنا في هذا الامر، تتهرب من الجماع وكل ما طلبتها تقول بعدين بعدين حتى كرهت نفسي وكانني لم اتزوج حاولت كثير لكنها تعاند.

إذا جيت أكلمها بهدوء وأتودد لها وأتقرب منها تقول لي ما تقرب أنا تعبانه وما لي خاطر اليوم، طيب متى لها خاطر؟ يمر أسبوعين وثلاثة بدون جماع بيني وبينها!

أنا يا أخواني وأخواتي طلقت زوجي السابقة لأنها ما تجيب عيال رغم إني كنت مرتاح معها، لكن الحرمة ما تجيب عيال ورفضت إني أتزوج عليها وطلبت الطلاق وطلقتها، وتزوجت صغيرة قلت لعل وعسى ربي يرزقني منها أطفال، الحين هي تعايرني وتقول لي أنت تريد تنام معي تبي عيال وأنا صغيرة ما ودي أجيب عيال!!!

طيب إذا ما ودها تجيب عيال ليش تزوجت عجل كان جلست في بيت أهلها تدرس أو تنتظر حتى تكبر بعدها تتزوج، تعبت وأنا أسايرها وأناقشها وما فيه فايدة، وطول الوقت تطلب هدايا اذبحتني طلبات يعني إذا ما جبت لها شيء وأنا داخل البيت تقلب الدنيا نكد، وتصير تتأفف طول الوقت، وتقرقع الصواني والقدور وتسوي إزعاج في البيت بشكل لا يطاق.

صار هذا مشوار أساسي أمر أي محل في الطريق أشتري لها شيء، أي شيء، مرة شريت لها قميص نوم أحمر، قلت يعني تلميح، فرته في وجهي وقالت هذا جايبه لنفسك مو لي !!! أنا خذتها لأنها اعجبتني كانت بنت جميلة لكن بعد الزواج وهالعشرة القشرة كرهتها وما عدت أريد أكمل معها، خذتها بيت أهلها وحاولت أشرح لهم مشكلة بنتهم لقيتهم يلوموني ويقولون إني مقصر معها، وإني غشيتهم وقلت لهم إني رجال ميسور وإنهم اكتشفوا اني مديون !!!

صحيح أنا عندي ديون بسبب بعض المشاريع اللي تضررت أيام كورونا، لكن الأمور رجعت طبيعية وديوني بسددها بنفسي، صحيح ما أقدر أدلعها مثل ما وعدتها في بداية الزواج، لكني أحاول وأسوي كل وسعي وما كنت أعرف إنها مهتمة بفلوسي بس وإني أنا ما أهمها

الحين أنا محتار مرات أشتاق لها ومرات أقول خلها تروح خلني أطلقها لأنها طالبة الطلاق وأهلها مصرين عليه وما أدري شو السبب الحقيقي لأنه ما فيه سبب غير إني مديون بصراحة، فشو الراي ؟