تعبت من المشاكل اللي ما تخلص بيني وبين زوجي
أنا متزوجة من ثلاث سنوات، وعندنا طفل عمره سنة. من أول ما تزوجنا والمشاكل ما وقفت، بس آخر سنة صارت الأمور تطفش وتخنق. صرنا نتهاوش على كل شيء، حتى على أشياء ما تستاهل.
يعني ممكن أقوم الصبح وأسوي له فطور، وإذا نسيت أحط شغلة بسيطة مثل الملح أو ما لقيت الكوب اللي يفضله، يعصب ويبدأ النقاش. وإذا سكت، يقول لي ليش ساكتة؟ وإذا تكلمت، يقول لي لا تجادلين. أحس إني دخلت مرحلة ما عدت أفهم وش المطلوب مني بالضبط.
يجي من الدوام معصب، وما يبي يسمع صوت. أحياناً يجلس قدامي ساكت، وإذا سألته وش فيك؟ يرد بعصبية ويقول مافيني شي، بس واضح إن في شي، وواضح إنه يبي يفتعل مشكلة. وإذا طنشت واشتغلت في شغلي أو ولدي، قال لي ليه ما تهتمين فيني؟!
حاولت بكل الطرق، أتكلم معه بهدوء، أطنش، أضحك، أغير جو، بس كل الحلول ما تنفع. كل فترة يرجع ويطلع لي مشكلة جديدة. وإذا صار بينا نقاش، ما يحب يسمع رأيي، ما يحب يشرح، بس يهاجم ويقلب كل شي علي.
المشكلة صارت تأثر على نفسيتي. صرت متوترة على طول، ما أقدر أرتاح. حتى لما أكون مع أهلي أو صديقاتي، أحس إني مشدودة. أحاتي البيت، أحاتي متى ترجع المشكلة، ومتى ينفجر من شي جديد.
ما صرنا نضحك سوا، ما نطلع، ما نتكلم عن شي طبيعي. كل شي صار نقاش وجدل، حتى لما نكون ساكتين، أحس الجو مشحون.
أنا ما أتكلم عن خيانة أو ضرب أو مشاكل كبيرة، لكن المشاكل اليومية اللي ما تخلص قاعدة تستهلكني. ما فيه سبب واضح، بس دايم فيه نكد. دايم فيه توتر.
تعبت من إني أحاول. وأحياناً أفكر إن الحياة كذا ما تستاهل. بس بنفس الوقت، ما أبغى أتهور وأتخذ قرار يندم عليه ولدي. أنا محتارة بين إني أتحمل وأكمل، أو أوقف كل شي وأبدأ من جديد.
هل في أحد مر بهالنوع من الحياة؟ كيف أتعامل مع زوج دايم متضايق؟ دايم يعصب؟ ما يبي يسمع؟ وش الحل مع شخص يعيش على المشاكل؟
ليست هناك تعليقات:
إرسال تعليق