السلام عليكم،
ما أدري كيف أبدأ، بس بحاول أطلع اللي في قلبي يمكن ألقى حل أو حتى أحد يحس فيني. أنا بنت كنت عايشة حياتي طبيعية، لين دخلت دوامة ما كنت أتخيل بيوم أدخلها.
كنت على سناب شات تجيني رسايل كثيرة، بعضها كنت أرد عليه وبعضهم لا، لين جاء يوم جتني رسالة من شخص طلب مني زواج متعة، قال لي بس لمدة سنة وبعدها بيتقدم لي رسمي ويخطبني من أهلي. كان يحلف ويقنعني ويقول إنه يحبني وإنه صادق، وكنت غبية صدقته… للأسف.
صرت أرسل له ويرسل لي، واتفقت معه أروح معه بيت خالته، يوم رحت قفل الباب علي، وقلبي وقتها انقبض حسّيت إني وقعت في مصيدة. شفت في عيونه شي يخوف، عرفت إني اختياري غلط. حاول يلمسني ويعتدي عليّ، وأنا كنت عذراء. خفت أموت من الخوف. رغم إنه لمسني طلعت الحمد لله بعد فحص الدكتورة إني بكر، بس الخوف والوجع بقلبي للحين.
بعدها بأيام اختفى فجأة، بلوكني من السناب، ودورت رقمه حصلت أهله يردون عليّ يقولون إنه مسافر، ولما رجع، كلمني وبدأ يسبّ ويشتم بأبشع الألفاظ، ويهددني بمحاكم وبالشرطة وبأخته. صار يصرخ يقول لي: "إنتِ خلاص صرتي ملموسة" وكأنه يذلني. وأنا وقتها منهارة، أبكي كل يوم وأحس نفسي ضايعة.
زادت معاناتي لما دخل علي على إنستغرام بطريقة ما أدري كيف حصل فيها حسابي. صار يطلب أشياء مقززة، يبغى ينام معي وبعدين صديقه معي وبعدها صديقتي! هنا حسّيت قلبي يطيح في الأرض، صرت أعرف إنه هذا مو بس كذاب، هذا إنسان قذر وما فيه ذرة رجولة.
وللأسف، مو بس هو اللي دمرني…
كان عندي حساب سيارات وأحط فيه مقاطع كنت أعصب فيها من قهري على اللي صار. راعي الحساب استغلني لما عرف قصتي، قال لي عنده وظيفة لي، وطلب مني أوراقي. وافقت عشان كنت مضغوطة نفسياً وأدور أي مخرج. للأسف الشديد، طلع كذاب هو بعد، وركبني بسيارته، وبدأ يلمسني بحجة إنه زواج متعة وكتب عقد بخط يده! وحتى ضربني كف وأنا في السيارة!
كنت أعيش في خوف كل يوم بعدها، أخاف أكون حملت، لكن الحمد لله نزلت الدورة وارتحت شوي. بس الخوف ظل معاي، صار ملازمني، حتى النوم ما صرت أعرف له، صرت أصحى من النوم وأنا مفزوعة، أخاف من الناس كلها، حتى الوظائف صرت أكرهها وأكره كل مكان فيه ناس.
فقدت الثقة في الكل، حتى بأقرب الناس لي، صرت أعيش في عزلة، كأني مكسورة من الداخل وما أعرف كيف أجمع نفسي.
أكتب لكم وأنا قلبي يحترق، حرفياً أحس نفسي ميتة وأنا عايشة.
ساعدوني بالله، قولوا لي شلون أطلع من هالدوامة، شلون أرجع أثق بنفسي وبالناس؟ شلون أمسح هذا كله من روحي؟
أنا محتاجة أحد ينقذني قبل لا أغرق أكثر.
هناك تعليق واحد:
وعليكم السلام ورحمة الله وبركاته،
يا قلبي، والله وأنا أقرأ كلامك أحس كأني أقرأ قصة قديمة من حياتي… قصة كنت أحسبها مستحيل أنساها أو أطلع منها، بس بفضل الله طلعت… وتغيّر كل شي.
أنا وحدة عشت وجعك، عشت الخوف، الصدمة، الإحساس بالخذلان من أقرب الناس، والكره لنفسي قبل لا أكره أحد ثاني.
أذكر كيف كنت أقعد أبكي في زاوية غرفتي، ما أبي أشوف أحد، أتهرب من كل مكان، وكل صوت يخليني أرتجف…
بس الحين؟ أنا متزوجة، عندي عيالي، وقلبي متطمن، وعارفة إن ربي ما تركني لحظة، حتى لما كنت أظن إني وحدي.
وشلون صرت كذا؟
ما صار بيوم وليلة، ولا فجأة، لكن فيه خطوات بدأت تغيرني شوي شوي:
🔹 أول شي سويته: قطعت كل تواصل مع أي أحد عنده طرف من القصة.
حتى لو فيهم شي من الحنية الظاهرة، ما عاد أثق. حذفت، حظرت، وغيرت كل حساباتي، لا إنستغرام ولا سناب ولا رقم، كله راح. لازم تنقذين نفسك من جوهم أول.
🔹 ثاني شي: لجأت لله بكل دمعة وكل تنهيدة.
والله ما أقولها ككلام مثالي، بس أقسم بالله إني كنت أسجد وأقول:
"يا رب، طهر قلبي، خذني من هالمكان لبرّ الأمان، أنا ضعيفة وأنت القوي، أنت الرحيم."
كل ليلة كنت أصلي قيام، حتى لو ركعتين، وأبكي، وأقوم أحس إن ربي شال عني شوية ألم.
🔹 ثالث شي: رحت أخصائية نفسية.
لا تخجلين، ترى هذا حقك، مثل ما الجسم يمرض القلب والروح تمرض، وأنتِ حالتك مو بسيطة، أنتِ تعرضتي لصدمة نفسية وجسدية. الأخصائية ساعدتني أرتب مشاعري، أفهم كيف أتعامل مع الماضي، وتعلّمت كيف أغفر لنفسي قبل أغفر لأي أحد ثاني.
🔹 رابع شي: كتبت كل شي.
فتحت دفتر وكتبت، بدون تفكير، بدون ترتيب، كتبت كل اللي حسيت فيه، وكل اللي صار. كان الدفتر طبطبة، كان الحضن اللي ما لقيته من أحد.
🔹 خامس شي: بدأت أعتني بنفسي.
مو عشان أحد، بس عشان أنا. لبست شي حلو، مشيت في الشمس، غيرت شعري، حتى لو كنت داخلي مكسورة، كنت أحاول أعلّق أمل على شي صغير… وكل يوم كان في شي يتغير.
🔹 والأهم من كل هذا: سامحت نفسي.
إيه، سامحتها، ما لعنتها، ما كرهتها، قلت لها: "إنتِ كنتِ ضحية، بس الحين، إنتِ أقوى."
وش تبين أقولك؟
أنا اليوم أنام وأنا مرتاحة، أناظر عيالي وأقول:
"يا رب شكرًا، لأنك ما خذلتني، ولأنك علّمتني من الوجع كيف أصير أم، كيف أصير زوجة، كيف أصير قوية."
وأنا أقولها لك من كل قلبي:
إنتِ بتعدّين، وبتعيشين أجمل من اللي راح، وبيجيك يوم تضحكين على هالوجع وتقولين: كان بداية ميلاد جديد.
إرسال تعليق