زوجي طلقني بسبب...

 "طلقني وترك بنته... لا يسأل ولا يهتم، كأنها مو من دمه"

أنا كنت متزوجة، وكنت موظفة، ووقتها خطيبي (زوجي لاحقًا) كان يضغط علي من البداية إني أنقل من ديرتي وأقرب له.
قلت له من وقت الخطوبة بكل وضوح: أنا ما راح أنقل، مهما صار.
واتفقنا على هذا الأساس، وتم الزواج.

لكن بعد الزواج، بدأ يختلق المشاكل بسبب نفس الموضوع اللي اتفقنا عليه من قبل، وكأننا ما ناقشنا.
أنا من البداية ما كنت شايفة إن الموضوع يستاهل، لأن النقل مو سهل، وغير كذا هو شخص ما يعطيك ثقة تنقلين عشانه وتتغربين، كل شوي له رأي وتصرف، وما كان فيه استقرار أبدًا.

المهم، حملت، وبعد ما جبت بنتي، صار يهجرني، ما يسأل، ما يهتم، حتى لما كملت البنت سنة، طلقني وراح في حال سبيله.
واللي يقهر أكثر؟ إنه ما قد شافها ولا حتى سأل عنها، ولا حتى أحد من أهله... لا أمه ولا خواته ولا أي أحد.
كأنها ما تعني لهم شي، ولا كأنها دمّهم!

الحين بنتي كبرت وصارت تفهم، وكل يوم أفكر... لو صار لي شي، وش بيكون مصيرها؟
أنا قاعدة أشتغل على تأمين مستقبلها.
أمنت لها بيت، وأجمع لها مبلغ شهريًا، أبي يكون عندها شي تعتمد عليه لو احتاجت.

مو ضامنة الدنيا، ولا أحد. لا من خوالها ولا من خالاتها.
بس أكثر شي مستغربة منه، هالدرجة من القساوة؟
ما شافوا مني شر، ولا سببت لهم أذية، ليه هالجفاء؟ ليه ما يعترفون حتى ببنتهم؟!

اللي مريت فيه موجع، لكن اللي موجع أكثر هو الظلم اللي قاعدة أشوفه على بنتي من أقرب الناس لها.