أحس إن في أحد ينام معاي وأنا نايمة، وتصير لي أشياء غريبة ما أفهمها
السلام عليكم ورحمة الله وبركاته، أنا وحدة متزوجة من كذا سنة، عمري بأواخر الثلاثينات، حياتي نوعًا ما مستقرة، زوجي معاي وما في مشاكل كبيرة الحمدلله، بس في موضوع صايرلي ومسببلي رعب وقلق ما يعلم فيه إلا الله.
صارلي تقريبًا سنة أحس بأشياء غريبة تصيرلي وأنا نايمة. بالبداية كنت أقول يمكن حلم أو تخيلات، بس الحين تطور الوضع وصار متكرر وواقعي بشكل يخوف.
أنا لما أنام، فجأة أحس كأني مو نايمة عدل… جسمي نايم بس أحس بروحي واعية، وبديت أحس إن في أحد يلمسني، وأوقات اللمسات تكون واضحة جدًا، حتى أحس كأني قاعدة أمارس علاقة كاملة، بكل تفاصيلها، إحساس الحركة، الضغط، وحتى التفاعل الجسدي… وأقوم وأنا مصدومة، جسمي فعلاً يكون تعبان وكأني فعلاً صارلي شي!
ومو بس هالشي، مرات أحس إن في أحد يلمس شعري، لمسة خفيفة بس واضحة، أو كأن أحد قاعد يتنفس بوجهي وأنا نايمة، وأوقات أحس أحد يوقظني أو يتحرك على السرير جنبي، ولما أفتح عيوني ماكو أحد، وزوجي يكون نايم على الطرف الثاني أو أصلاً مو موجود بالغرفة.
أنا ما أتكلم عن مجرد حلم… الإحساس حقيقي لدرجة إنه يأثر على نفسيتي طول اليوم، قمت أخاف من وقت النوم، ولا أنام عدل، وصار عندي قلق مستمر. حتى مرات أقعد الصبح أحس بأثر فعلي بجسمي… وأصير محتارة: هل هذا من نفسي؟ ولا في شي ثاني قاعد يصير؟
أنا أقرأ الأذكار دايم، وأشغل قرآن، بس الوضع ما تغير، والمشكلة إني إنسانة متدينة ومو متعودة أتكلم عن هالأشياء، بس وصلت مرحلة تعبت.
أنا ما أبي أخمن، ولا أبي أحد يخوفني، أبي تشخيص أو رأي مختص. هل في ناس تمر بهالشي؟ هل هذا مرض نفسي؟ أو اضطراب نوم؟ أو له علاقة بشي روحي؟ هل في تحاليل أقدر أسويها؟ أبي أرجع أنام وأنا مرتاحة، مو خايفة من الليل!
اللي عندها تجربة أو أي دكتور يقدر يفيدني، الله يخليكم، لا تبخلون علي، لأن هالشي قاعد يدمر راحتي وصحتي.
ليست هناك تعليقات:
إرسال تعليق