زوجي طلقني في رسالة نصية !!!!

استفزيت زوجي وطلقني، الطلاق عبر الواتس آب، الطلاق كتابة بدون تلفظ، زوجي ارسلي رسالة انتي طالق، هل يقع الطلاق برسالة واتساب.

زوجي طلقني في رسالة نصية !!!!

زوجي ارسلي رسالة انتي طالق، كنت جالسة أكلمه على الوتساب وكتبت له إني متضايقة من أمه لأنها كل يوم تسوي مشاكل معي، بدون سبب، تفتعل المشاكل من تحت الأرض،

وتعاملني مثل الشغالة في البيت عندهم، يعني تحاسبني متى قمت من النوم ومتى نمت، وكم ساعة اشتغلت وليه ما غسلت كذا وليه ما طبخت كذا، وأنا ساكته عليها ومتحملة وأقول ما عليه حرمة كبيرة، لكن هذاك اليوم جتني وأنا جالسة مع جارتي نسولف وصارت تصرخ علي وتقول أنت ما شايفة شغلك في بيت زوجك!!!

المهم أنا كتبت لزوجي بس كم من كلمة كتبت : أمك صرخت علي قدام جارتنا وحرجتني وذلتني وأنا مو قادرة أستحمل !!! لقيته أرسل لي على طول بعدها بثواني: أنتي طالق!!!

طبعا أنا انصدمت، وكذبت عيوني، وقلت لا أكيد هذا ما هو زوجي هذا واحد ثاني، أكيد، لكن هذا رقم زوجي ماني غلطانه، رحت اتصلت له ما رد علي، أرسلت له على الوتساب لقيته بعد ما طلقني حظرني !!!

أتصلت بأبي وحكيت له اللي صار، قال: خليه يجيبك البيت، ونشوف !!!

رحت غرفتي جمعت ملابسي لقيت عمتي أم زوجي جت تقول: أنا قلت له يردك، لكن مو كل مرة بيصير كذا، إذا ما سمعتي كلامي أخليه يطلقك وما يردك لو تموتي! قلت لها: "إيش !! أنت مفكرة نفسك إنت وأبنك إيش؟ إيش النرجسية اللي أنتو فيها ذي، أقول لك، أنا ما أريد أرجع له"، قالت: مو بكيفك، هو ردك وخلصنا على كذا.

قلت لها : عجل طيب، شوفي إيش يعني تتنمري علي أنت وأبنك.

رحت أخذت شنطتي وقفت عند الباب ودقيت على أوبر، جت تقول: استحي على وجهك وأرجعي البيت؟ قلت لها : ما أرجع، مو بكيفك أنت ولا بكفيه ما برجع لو أنت تموتي !!!

صارت تناظرني باحتقار، قلت لها: شوفي، ترى أنا ماني الشغالة اللي جابها لك أبنك، روحي جيبي لك شغالة من مكاتب الشغالات، وعطيها راتبها آخر الشهر مو تنسين، وبعدين على فكرة ترى الشغالة لها راحة ساعتين في نص اليوم، وتنام من ثمان الليل وممنوع تزعجينها أو تطلبينها، عشان تخدمك بعد ثمان !!! وبعد أعلمك عليها ترى من حقها تشتكي عليكي لو رفعتي صوتك أو أهنتيها!!! ...

صارت تناظر فيني مستغربة ومو مصدقة، كأنها أول مرة تسمع هالمعلومات...

طبعا أريدها تفهم إني مو شغالة، وأن معاملتها لي أسوأ بصراحة، راحت دخلت وقفلت الباب، وأسمعها تكلم ابنها وتقول له: تعال بسرعة الحق عليها قبل مايوصلها أوبر وتروح، عقب من بيقوم بك وبطلباتك أنا مرة كبيرة وتعبانه ما أقدر!!!

معقولة هذي!!! يعني أنا عندها بس عشان أخدمها هي وابنها، ما قدرت أتحمل، رحت لفيت وراء البناية، وخبرت أوبر يجيني هناك عشان ما يشوفني زوجي إذا جاء، وجاني اوبر الحمدلله وروحت عند ابوي، طبعا ابوي زعل مني لأني ما خليت زوجي يجيبني قلت له ما بيجيبني أمه محتاجة لي شغالة في بيتها، قال : تخسي إلا هيه، ليش ما علمتيني من بدري اتصرف معهم، ...

المهم اتصل ابوي عليه، وقال له: لاعاد تجي تدور عندنا مرة، يا تطلقها بكرامتك يا تخلعك هي، وتشوف رجال أخير عنك وأرحم من أمك !!!

وهذي أنا من ثلاث شهور في بيت أبوي ما طلقني، وكل يوم مسير علينا رجاجيل يتوسطون له، وجت أمه من كم يوم وصاحت عند أمي تقول إنها ما كانت تقصد وإني أنا يعني تقصدني حساسة وأنها هي كانت تحبني وما تضغط علي، لكن أنا راسي يابس وما أسمع كلامها، وكلام كثير تحاول تغلطني وتركبني الخطأ غصب!!! قلت ما عليه ما يخالف، لكن والله في سماه، ما رجعت إلا إذا جابت لها هي ولدها شغالة، ولا أنا بدور وظيفة أخير لي...

أبوي شغل معارفه كلهم يدورون لي على وظيفة، وزوجي سمع إني أدور وظيفة قام يهدد ويتوعد، ويقول ما عندي نسوان يشتغلون، قال له أبوي: ما عندك أنت، لكن نحن عندنا، ما ودك فيها إذا اشتغلت خلها لسبيلها، لا أنت مغصوب عليها ولا هي بغاصبينها عليك... !!!

مااااااااااات زوجي مات، صار يصرخ ويزبد، ما أدري إيش فيه، يعني ما يريدني أشتغل، وأنا أريد أشتغل خلاص إذا روح في حالك... ليش منقهر طيب ؟

من يومين مرسلي رسالة: أنا آسف إذا قسيت عليكي، لكني أحبك !!!

بس كذا ، غريبة ما عمري سمعت منه كلمة أحبك، ولا قد شفتها، ولا حتى حسيتها، وش ذا الحب اللي ما يطلع إلا بعد ما يفوت الفوت!!! أنا حدي كرهته ولا أطيق أناظر في وجهه وكل يوم يمر علي في بيت أبوي أصحى على نفسي أكثر وأستغرب مواقف كثيرة صبرت فيها عليه هو وأمه وأستغرب إني قبلتها على نفسي، يعني واضح إني كنت صبورة وبنت أصول وهم استغلوا فيني ذا الشيء وساقوا علي غرورهم وظلمهم.

يمكنك أن تترك تعليقك هنا  

كمجهول، 

دون الكشف عن هويتك.