كرهت زيارة أهل زوجي وجمعاتهم اللي ما تخلص !!!

كرهت زيارة أهل زوجي وجمعاتهم اللي ما تخلص !!!

  مشكلتي إن زوجي يضغط علي أحضر كل مناسبات وجمعات أهله، حتى لو كنت تعبانة أو ما لي خلق.

أنا زوجة الكبير بين إخوانه، وهذا سبب أساسي إنه يحاول دايم يخليني أكون حاضرة بكل تجمع عائلي لهم، سواء مناسبات أو جمعات عادية. المشكلة مو بس إنه يطلب مني أحضر، المشكلة إنه يزعل لو تأخرت، أو طلعت بدري، أو حتى لو رحت وأنا مالي نفس. كل مرة تنتهي بخلاف ومشاكل ممكن تمتد لأيام أو حتى أسابيع بدون كلام بينا.

اكتشفت لاحقًا إن أمه هي السبب الرئيسي ورا هالضغط، لأنها دايم تعلق: "ليش ما تجي؟"، "ليش تطلع بسرعة؟"، "ليش تأخرت؟". الكلام هذا يأثر عليه كثير، فيرجع لي معصب ويحملني كل شيء.

أنا ما قصّرت، أروح وأسوي الواجب، بس تعبت، وقلت له إن علاقتنا ما المفروض تكون مرتبطة برضى أمه عني بهالشكل. خصوصًا إنه قال لي بالحرف: "أبي أعوض أمي عن أختي المتوفاة فيك". وأنا رديت عليه إنه ما أحد يعوّض أحد، وأنا مو بديل لأحد، حتى لو كانت نيتك طيبة. أنا بعد فقدت أمي وأخوي، ومو معناته إني أطالب أحد يعوضني فيهم.

اللي قاعد يصير الآن، إنه كل علاقتنا مبنية على مدى إرضائي لأهله، وهذا يرهقني. ما أقدر أكون شخص ثاني عشان أرضيهم، ولا أتحمّل الضغط النفسي اللي يصير كل مرة، خصوصًا إني ما أسيء لأحد، وأأدي الواجب.

أنا مو ضد إن الزوجة تحترم أهل زوجها وتشارك، لكن مو لدرجة تصير مجبرة تواكب كل شي حتى وهي مو مرتاحة.

السؤال هنا: هل أتنازل عشان أرتاح من المشاكل وأكسب راحة بال زوجي، حتى لو على حساب نفسي؟ أو أستمر أوضح له إن علاقتنا المفروض تكون مستقلة عن ضغط أهله؟