زوجي أهانني طردني من البيت

 

أنا في حالة صدمة وأقصى حالات الإنهيار النفسي، مو قادرة أصدق اللي سواه فيني زوجي، كفخني تكفيخ وبعد ذلك وبعين قوية طردني من البيت أمام عيالي ولا همه شيء، كل هذا بس لأني رديت على وحده حقيرة متصله فيه، وقلت لها إنه ريال متزوج،

كان زوجي في الحمام يسبح، وجوالة يرن ما يسكت لحظة، يعني كانت ( الكلـــــxxxـه ) تريده يرد عليها غصب حتى لو كان مشغول، صوت تيلفونه أزعجني وأزعج ولدي اللي توي مرقدتنة بعد ما هلكني صياح، فقلت خليني أشوف من المتصل، لقيته مسجل أسمها باسم ريال من ربعه، لكني أعرف هالحركات وأعرف انها وحدة مهي واحد، رديت على التيلفون وأنا في قلبي أدعي ربي يطلع واحد من ربعه، لأني برتاح لو كذبت ضنوني، وعادي بقول له ان زوجي في الحمام يسبح وبيكلمه من يطلع، لكن للأسف كل شكوكي طلعت صحيحة وسمعت صوت وحده تقول (( وييييييييييييينك حبي )) قلت لها (( ووجع )) قالت (( من أنتي )) قلت لها (( أنا جهنم اللي يعلها تاكلك )) ردت علي بطريقة فيها غيرة، يعني على أساس إنها هي اللي غيرانه مني، وكأنه بعد من حقها تغار، قلت لها (( أنا زوجته زوجت الحمـXXXار راعي هالجوال اللي انت داقه عليه )) قالت بغصة : شكلي غلطانه في الرقم هذا مو جوال فلان؟ رديت عليها بثقة : هو نعم هو وأنا زوجته، شكله مو قايل لك إنه متزوج مو؟ بلعت ريقها وسكتت، قلت لها : ليش سكتي الحين، توه بطبين من الجوال في بطني، والحين بلعتي لسانك)) قالت: (( سامحيني زوجك ما قال لي إنه متزوج)). قلت لها : عادي، أغلبهم ما يقولون لكن إنت يعني ما حسيتي إنه متزوج، واحد يقفل عنك جواله وما يرد على مكالماتك في أوقات محددة كل يوم شو بيكون يسوي يعني، أكيد يا متزوج يا عنده غيرك.

أستغربت برودي، وقالت لي: أنت عادي عندك يعني؟!!! قلت لها : لا مهو عادي لكن شقدر أسوي، ما عندي حيلة غير الصبر، عندي منه دستة عيال أريد أربيهم" وهنا كانت الصدمة الثانية، قالت: وعنده عيال بعد؟ قلت لها نعم: عنده خمسة في عين العدو" قالت: ((آآآآآآآآآه يا الخسيس")) قلت لها : احترمي نفسك ما أسمح لك، ما أسمح لحد يسب زوجي غيري، بعدين يعني أنت شو تبين فيه خلاص اقلبي وجهك.

لكنها ما عجبها الوضع، وقالت لي: (( كيف أتأكد إنك زوجته مو وحدة وده تفرق بيني وبينه؟ لأن برودك معي مو طبيعي ومو ردة فعل زوجه طبيعية)) ما تدري إني تعودت من كثر نزواته خلاص، جلدي صار جلد تمساح، قلت لها: (( الحين أعطيكي عنوان البيت، وتعالي، وبتشوفينه قاعد في الصالة يشرب قهوة معي، مسوية له صحن كنافة، وأول ما يطلع من الحمام بيجلس يتقهوى معي، تعالي إذا كنتي قريب من بيتنا، حياك الله، تونسينا!!!)) وأرسلت لها اللوكيشن من جواله بعد!!!

وهي ما كذبت خبر، ما هي إلا ربع ساعة وألاقيها قدام الباب، وزوجي جالس في الصالة بملابسه الداخلية، مفترش الأرض وصاب قهوته، ويسولف مع بنته، قمت دخلتها عليه أول ما شافها قام فز واقف يرتجل، ويرجف من أرضه لين سماه، ويخرطف بالكلام، وهي تطالع فيه وتطالع في عياله يلعبون حوله، لأول مرة أحس برااااااااااحة ما بعدها راحة، أول مرة أشوف زوجي مهيون ومنذل وصغير لها الدرجة، هدت لسانها عليه وما خلت كلمة تعور إلا وقالتها فيه،والله إنها وحده قوية بردت حرتي فيه، وهو بكل بساطة واقف يناظرني بحقد وغل، ويناظرها بحرج، وعياله يسألون : بابا من هذي الحرمة،

طلع زوجي واعدنها بالزواج، وطلعت البنت وحده صاحبة ثروة وعقارات، وزوجي شكله طمعان فيها، وقال في خاطره خليني أواعدها وأضبطها وعقب خليها تكتشف الحقيقة براحتها، لكن أنا رديت على جواله وخربت عليه ملعوبه!!!!

زوجي طردني ولم يسأل عني​
زوجي أهانني وطردني​

عقب ما طلعت هي من البيت، طبعا هو عرف من كلامها إني رديت على اتصالها وإني عطيتها عنوان البيت، فجن جنونه، يعني أمامها كان واقف مثل المسمار ما له كلمه، ولا معنى، لكن من راحت، انقلب وحش كاسر وصار يضربني ويصفعني وحتى رفس رفسني أمام عيالي ولا همة، وأنا توني والدة من شهرين، وبعدها سحبني من يدي وطلعني برع البيت وقال للشغالة ما تفتح لي الباب، واتصل بأهلي عشان إيون ياخذوني، وأهلي قالوا له أنت جيبها، لكنه ما عبر، وقال لهم إذا تبونها خذوها او خلوها تنام بالشارع ما يهمني!!!

لا وبعد شنو يقول؟ !!!

يقول إنه بيشتكي علي لأني رديت على جواله، وهذا مو من حقي!!! وأنه يحق له يتزوج مثنى وثلاث ورباع، وإني خربت عليه مشروع زواجه متعمدة!!! ما أدري شو مشروع الزواج هذا اللي يريد يبنيه على الكذب والغش والخداع!!!

أنا في بيت أهلي من أسبوعين، ورمضان قريب ومو عارفة كيف بيمر علي رمضان وأنا بعيده عن عيالي، وهو رافض حتى يتكلم معي أو يتفاهم مع أهلي، حاسة بالقهر بموت من القهر، يعني كيف كذا، فوق ما هو يخوني، بعد هو اللي يطردني ويبهدلني، أهلي يقولون لازم أشوف محامي وأطلب الطلاق لانه ضربني وأهاني أمام عيالي،

أخوي يقول إنه فيه واحد من ربع زوجي قاله إنه يحاول يصلح علاقته بالبنيه اللي كشفته لها، وإنه مصر يتزوجها، وهذا شي عادي لان زوجي أصلا يحب الفلوس يمووووووووت في الفلوس، البنيه عادية جدا وما عندها شيء يميزها عن غيرها كل الموضوع إنها غنية وعندها فلوس، وتأخرت في الزواج، وتريد الستر، لكن زوجي أعرفه بيتزوجها وبياكل فلوسها وبيتركها وبيشوف غيرها، أعرف طبعه زين،

لأني مريت بنفس التجربة، كان عندي ورث من أبوي الله يرحمه، وأول ما استلمت ورثي خذه زوجي كله وبدون حتى ما يعطيني شيء منه، وللحين ما أعرف عن فلوسي شيء، أخواني جن جنونهم يوم قلت لهم، تراني كنت أكذب عليهم وأقول لهم مسيفه فلوسي في البنك، لكن بعد اللي صار اضطريت أعترف لهم إنه خذ مني فلوسي،

أخوي متأكد إن المحكمة بتجبرة يرجع فلوسي، لانه خذهم مني بدون اذني واستغلني لأني زوجته، بس انا خاااااااااااااايفة موت ياخذ مني عيالي، ما أدري شو أسوي، وأقول ليش يا ربي هذا نصيبي، ليش ما كان زوجي إنسان طيب، ويعرف قيمتي، ويعيش معي عيشة هنية، ليش يعني لازم يكون حظي أتبهدل وانذل أنا وعيالي، تعبت يا خواتي، شو تشورون علي ورجاءا بسرعة لأني جالسة على جمر!!!