عمري ٣٠، وتوني أتعلم في هالحياة!!!! تزوجت قبل سنة ونص، زواج عادي، لا حب قبله ولا شيء، لكن قلت: نصيب، يمكن هو الخير كله، زوجي كان حنون، شكله ملتزم، وموظف قطاع خاص، ما عنده دخل ثابت، بس كنت أقول: رزقي ورزقه واحد.
بشهر العسل…
جاني منه مسج غريب، قال لي فيه: "انتظريني يا فلانة."لكن هذا مو اسمي وهالاسم؟ ما له أي وجود بين أهلي أو أهله…
سألته بعدها بيومين، ضحك وقال لي: "أنتِ قريتي غلط!"
وسكت.
حاولت أصدّق، قلت يمكن فعلاً خطأ.
لكن بعدها بأيام، شفت حوالة بنكية، المرسل اسم يبدأ بنفس الحرف بالإنجليزي…
هنا وقفت.
حسيت قلبي مو مرتاح، بس ما كنت أملك دليل، ولا ودي أعيش بشك.
ومرة من المرات، بدأ يسألني عن رأيي بزواج المسيار، قلت له بوضوح:
"أنا؟ ما أتحملها. ولو صار، أطلب الطلاق فوراً."
سكت، ما رد، لا أيد ولا رفض… وهذا بحد ذاته كان غريب.
عدت الأيام، وحملت، وجبت طفل بعد ثلاث شهور من الزواج.
وأنا بالأربعين، منهكة من الولادة، ومن السهر، ومن التغيرات اللي تمر فيها كل أم جديدة…
ناداني… باسمها.
اسم ما له علاقة باسمي، لا في الحروف، ولا في النطق.
وقفت كأني تجمدت.
عرفت، تأكدت، ما عاد في مجال شك، الرجل متزوج عليّ… من وراي.
سؤالي لكم يا بنات:
أنا أبغى الطلاق. قلبي ما عاد يقدر يصدّق أو يتعايش أو يسامح، حتى لو حاولت.
بس أنا ما أبغى أرجع له المهر، ولا شيء من تكاليف الزواج، لأنه غشاش وكذاب وخاين من البداية.
هل الطلاق يكفيني؟ ولا أطلب خلع؟
وش تنصحوني؟
أنا مو ناقصة وجع، ومالي خلق أقعد أمثل إن الأمور عادية، أنا مو من هذا النوع أبدا ساعدوني كيف أتصرف.
ليست هناك تعليقات:
إرسال تعليق