مخطوبة وخايفة وما عندي أم توجهني

 أنا مخطوبة وقلبي مليان خوف… يتيمة وأحس نفسي داخلة على عالم ما أعرفه

السلام عليكم…

أنا بنت عمري 17 سنة، يتيمة، وأصغر وحدة بين خواتي، كلهم تزوجوا، وكل وحدة راحت لحياتها، وبقيت أنا لحالي. والآن أنا مخطوبة، ووالله إني خايفة، مو شوي… مرّة خايفة.

خايفة من الزواج، من الرجل، من المسؤولية، من بيتهم، من أمه، من خواته، من كل شي. كل شي قدامي مجهول، حتى نفسي ما صرت أفهمها من كثر التفكير. 

أحاول أتصرف بثقة قدامه، أسمع كلامه، أضحك، أسايره، بس لما أرجع غرفتي وأقعد لحالي، تنزل دمعتي بدون ما أحس.

أحس كأني داخلة امتحان كبير، وما ذاكرت له زين، وما عندي أحد يراجع معي.

أنا ما أطلب كثير، بس أبغى أكون "قدّها"، أبي إذا تزوجت ما أكون ضعيفة أو مهزوزة، بس ما عندي أحد أرجع له وأسأله. خايفة أنصدم، خايفة أتورط، وخايفة أضيع.

أنا ما أدري إذا خوفي طبيعي، ولا من حقي أتراجع، ولا المفروض أتحمّل وأسكت، بس كل اللي أعرفه إن قلبي مو مرتاح… وخايف جدًا من اللي جاي.