أنا متزوجة من شخص هو أكبر إخوانه، وهذا الشيء من البداية سبب لي نوع من الضغط، لأنه دايم يشعر إنه لازم يكون قدوة، ولازم علاقته بأهله تكون مثالية، وهذا ينعكس علي مباشرة. من بداية زواجنا، زوجي يصر إني أكون حاضرة بكل المناسبات العائلية، وكل الجمعات سواء كانت رسمية أو حتى جمعة عادية. وأنا، رغم إني أحاول أكون موجودة قد ما أقدر، إلا إن في أحيان كثيرة أكون تعبانة أو ما عندي طاقة اجتماعية أو ببساطة ما لي خلق، ومع كذا لازم أروح، وإذا ما رحت تصير مشكلة.
حتى لو رحت، مو كفاية، يبدأ يسألني ليش تأخرتِ؟ وليش طلعتي بدري؟ وإذا شاف إن خروجي مو مناسب له، تبدأ المشاكل. بعد فترة اكتشفت إن كثير من ردات فعله مرتبطة بكلام أمه، اللي كل شوي تسأله: "ليش ما جات؟ ليش تأخرت؟ ليش طلعت بسرعة؟"، أحيانًا كلامها يجي بشكل عابر، لكنه يأثر فيه بزيادة، فيرجع يعاتبني وكأنه لازم أكون موجودة طول الوقت وما أغيب أبدًا.
الموضوع تطور وصار يسبب لي توتر نفسي. أكثر من مرة دخلنا في مشاكل بسبب نفس الشيء، والمشكلة الأكبر إننا نظل نتهاوش ونسكت أيام، وما نرجع لبعض إلا بصعوبة، ودموعي تنزل وأنا منقهرة، كل هذا عشان شيء تافه مثل تأخري عن جمعة أو طلوعي منها بدري.
جلست مع زوجي وحاولت أتكلم معه بهدوء، شرحت له وضعي وتعب نفسيتي من الضغط هذا، وقلت له إني أزورهم وأسوي الواجب، لكن مو معقولة أتحمل فوق طاقتي عشان أرضي كل طرف. جوابه كان صادم بالنسبة لي، قال إنه يحاول يعوض أمه عن فقدان أخته اللي توفت من فترة طويلة، وإنه يتمنى أحل محلها.
قلت له بكل وضوح: "ما أحد يعوض أحد، حتى لو نيتك طيبة، أنا ما أقدر أكون مكانها، ومهما سويت ما راح أملأ فراغها." بعدين قلت له: "أنا بعد فقدت أمي وأخوي، لكن ما طلبت منك ولا من أحد إنهم يعوضوني عنهم، لأن محد يقدر يسوي هالشيء."
قلت له إن علاقتنا كزوجين لازم تكون منفصلة عن علاقتي بأهله، ما يصير كل ما صار شيء بسيط تقلبها علي مشكلة بحجة إن أمك زعلت. كل ما أحاول أرتاح أو أكون على طبيعتي، أحس إني تحت المجهر، لو جلست كثير يقولون ليش، لو طلعت بدري يقولون ليش، ولو غبت مرة تصير سالفة كبيرة. ومع كل هالتعب النفسي اللي أعيشه، أقول لنفسي: هل أنا المفروض أكون موجودة عشان أقدم كل شيء لهم؟ طيب وين أنا؟ وين راحتي وكرامتي؟
للأسف، هو ما يفهم، كل ما أتناقش معه، يحط مصلحة أمه فوق كل شيء، حتى فوق راحتي. وأنا ما غلطت عليهم، ولا قصرت، بس تعبت. سؤالي الآن: هل أستمر أتنازل وأجامل وأرضيهم عشان ما أخسر بيتي وزواجي؟ أو أقف عند حد معين وأوضح له إنه في أشياء فوق طاقتي، ومجرد كوني زوجة ما يعني إني أكون مسؤولة عن توازن علاقته بأهله بالكامل؟
ليست هناك تعليقات:
إرسال تعليق