زوجي ابتعد عني

 زوجي ابتعد عني

زوجي مو هو نفسه… فجأة ابتعد عني، وكأني مو موجودة"

مدري متى بدأ يتغير، يمكن من كم أسبوع، أو من كم شهر؟ بس اللي متأكدة منه إنه مو هو نفسه…
كان يشاركني كل تفاصيل يومه، حتى الأشياء البسيطة، مثل من شاف، وشو صار معه بالشغل، متى ضاق صدره، متى اشتاق…
واليوم؟ صاير ساكت، بارد، كأن بيني وبينه جدار.

أجلس جنبه ويحس فيني كأني هوى.
أقول له "وش فيك؟"، يرد علي بـ"مافي شي".
أسأله "زعلان مني؟"، يقول "أبدًا".
بس عيونه تقول غير، صمته يقول غير، وحتى طريقة نومه على طرف السرير تقول كل شي مو طبيعي.

صرت أخاف من سكوته، صرت أراجع نفسي ألف مرة:
هل قلت له شي يضايقه؟ هل قصّرت؟
هل أحد تعب خاطره مني؟
أو في أحد غيري؟

والله مو شكي فيه من فراغ، بس أنا أحس، أحس لما قلبه يبرد، لما حضنه ما يرجّفني مثل أول، لما ما يلمس يدي إلا إذا أنا مدّيتها.

المشكلة إنه مو من النوع اللي يفتح قلبه بسهولة…
منغلق، غامض، ما يعطيك أي خيط تفهمين منه.
والله إني أتمنى لو حتى زعل علي وصرخ، أهون من هالسكوت اللي يخليني أنهار بصمت.

كل يوم أقعد أفكر فيه، وش تغير؟
وش خلاه يبتعد؟
يمكن أنا تعودت على اهتمامه، وصرت ألاحظ كل تفاصيل الغياب…
بس حتى لو، أنا زوجته… من حقي أفهم، من حقي أعرف وين اختفيت، وانت لسى جنبي.