زوجي يكره اختي
زوجي يكره أختي… فكيف أتصرف؟
بدخل بالموضوع على طول بدون مقدمات، لأني عن جد محتارة ومخنوقة.
أنا متزوجة من كم سنة، وزوجي بشكل عام إنسان طيب، كريم، ويلبي كل طلباتي، يعني ما أقدر أقول إنه مقصر في حياتنا الخاصة… لكن المشكلة اللي مسببّة لي همّ ما هي صغيرة أبدًا: زوجي يكره أختي!
أختي متزوجة، وأنا بطبيعتي قريبة منها، أزورها بين فترة وفترة، وأحيانًا نطلع سوا. لكن زوجي رافض تمامًا إنه يوديني لها بسيارته، ويقول لي بالحرف: "إذا تبين تروحين بيت أختك، روحي مع أحد ثاني، أنا ما أوديك!"
تخيلوا؟! مع إنه يوديني لأهلي الباقين، ويسأل عنهم، ويحترمهم كلهم، إلا أختي هذي… كأنها خارجة عن القائمة!
اللي يقهر أكثر، إن أختي ما غلطت عليه ولا سوت له شي. هو سمع عنها كلام – وأنا متأكدة إنه مو صحيح – وصدق، ومن يومها وهو حاط في قلبه عليها. حاولت أفهمه، وأوضح له الصورة، وأقول له إن هذي أختي وأنا أعرفها زين، وإنها بعيدة كل البعد عن اللي سمعه، بس قلبه مقفّل.
وفوق هذا كله، هو يكره زوجها بعد، اللي فعلاً أسلوبه سيء وما يحترم أحد، بس هل هذا يعطيه الحق يكره أختي هي بعد؟!
اللي زادني قهر، إني خذيت جواله بالصدفة وشفت له محادثة مع أخوه، وكان يقول عني وعن أختي اللي رحنا لها: "أخذت زوجتي وزوجتك من عند الزبالة!"
أنا آسفة أكتب الكلمة هذي، بس ما تتخيلون كمية القهر اللي حسّيت فيها. حتى لو ما يحبها، هل يوصل فيه إنه يهينها بهالشكل؟ وهي أختي؟!
أنا ما أدري وش أسوي… أحاول أشرح له؟ أتصادم معه؟ ولا أسكت وأتجاهل؟
مرات أتعمد أجيب طاري أختي قدامه وأقول له إنها جابت لي شي أو سوت لي معروف، بس عشان أحاول يحن قلبه شوي ويخف كرهه، بس ما في فايدة.
وأتخيل لو صرت مثله وقلت له فجأة "أنا أكره أختك فلانة وما أبغى أزورها"، وش تتوقعون بيكون رده؟ أكيد بينفجر، ويمكن يوصل الموضوع للطلاق.
أنا جدًّا محتارة، بين نار أختي اللي أحبها وما أقدر أتحمّل أسمع كلمة فيها، وبين زوجي اللي ما أقدر أعيش حياتي بصراع دائم معاه…
وش الحل؟ كيف أتصرف؟
كل وحدة تحط نفسها مكاني… وش بتسوي؟ 💔
ليست هناك تعليقات:
إرسال تعليق