زوجي تزوج علي بدون سبب

 كلهم كانوا يعرفون أنه بيتزوج علي ولا حد منهم قالي أو خبرني !!!

للأسف أهله وأهلي يعرفون لكن ما خبروني وخلوني لآخر لحظة أكتشف بنفسي

أمي كانت تعرف وأخواني كلهم يعرفون ولا قالوا لي

وأمه وخواته وكل البيت كانوا يعرفون ولا خبروني

وأنا أقول اشفيهم يطالعوني بطريقة غريبة وبشفقه ما كنت فاهمة

إلين شفت عقد القران بنفسي بالصدفة كان ناسنه في درج السيارة

والقهر إنه تزوج علي بنت خالتي تخيلوا بنت خالتي

بنت خالتي كبيرة كثيييييييير عليه، أكبر منه بثمان سنين ويمكن أكثر بعد

مطلقة وما تييب عيال ولا أدري شو سبب زواجه منها\

أنا يبت له ثلاث أولاد بنت وش يبي أكثر ليه يتزوج ليييييييه

بنت خالتي تصير بنت خاله هو لكن هذا ما يعطيه مبرر إنه يتزوج علي

حاسة أنهم كلهم اتفقوا علي واخدعوني ما عدت أثق فيهم

حتى أمي كانت تعرف تخيلوا أمي خدعتني كانت تعرف

وما خبرتني ولا حذرتني ولا عطتني حتى مجرد تلميح

بالعكس كنت أقول لها حاسة إنه ريلي فيه شيء مو طبيعي

تقولي عادي ما فيه شي خلي عنك الشك وركزي في تربية عيالك

تخليوا

هذي مو أم كثييييييييير زعلانة منها وتعبانة نفسيا

ما عدت أثق بحد

خواتي كانوا يعرفون وكل ما أشتكي لهم منه ومن إهماله لي

يقولون ما عليكي ما فيه شيء يمكن الريال مشغول باله بشغله

شو أسوي معاهم لأني ما عدت قادرة أتحمل أشوف أي حد منهم

شو أسوي مع زوجي اللي تزوج علي بدون سبب وبدون مقدمات

محتاج حل لأني مو قادرة أتحمل الوضع

حاسة نفسي بجن مو قادرة أصدق إن فيه اهل بهالقسوة

وإن فيه أم تتعاطف مع زوج بنته وهو رايح يتزوج عليها بكل بساطة

أمي تقول إنها ما كانت راضية لكن ما كانت قادرة تقول لي

بس ما أصدقها لأنه على الأقل كان لازم تحذرني عشان أمنع هالزواج

حسيت إن أمي جاملت بنت إختها على حسابي

بنت خالتي جميلة كثير، أجمل مني، وأنيقة وشخصيتها جذابة

وقوية وواثقة من نفسها، وكان زوجها يحبها كثير،

لكن طول زواجها ما يابت عيال والسبب منها مو منه

ولا حتى تقدر تجيب أطفال أنابيب لأن مبايضها ما تنتج بويضات أساسا

فتزوج عليها زوجها مرة ثانية عشان تحمل وتييب لها عيال

لكنها رفضت تكون الزوجة الأولى وطلبت الطلاق ورفض زوجها يطلقها

لكنه خلعته، ويلست بيت أهلها سنة ونص وعقب خذت مني زوجي

يعني كيف ما رضت زوجها يتزوج عليها وترضى تتزوج زوج غيرها

ما فهمت كيف تفكر وشو هالمخلوقة شو تبي يعني

كيف ترفض تكون زوجة أولى وترفض زوجها يتزوج عليها

ثم تروح تتزوج زوج بنت خالتها وتقبل تكون زوجة ثانية

شو القصد شو الحكمة في الموضوع

بجن بصراحة مو فاهمة الوضع ولا قادرة أفهم

تصرفها مرة غريب ومو مفهوم

زعلت وحاولت أطلع من بيت أهله وأروح بيت أهلي

لكن أمي حلفت علي ما أترك بيتي وأقبل الأمر الواقع

وأبوي قال لي ممنوع أرجع بيته إلا إذا زوجي هو اللي جابني

وزوجي يقول لي خلك في بيتك،

قام شرى لزوجته الجديدة غرفة نوم جديدة وحطها في الغرفة المقابلة

يعني صارت تنام في الغرفة اللي مقابلة غرفتي

كنت أفكر أرتب هالغرفة لبنتي عشان أنقلها من غرفتنا بعد ما صار عمرها سنة

لكن الحين هو عطاها لزوجته الجديدة

مو قادرة أستحمل صراحة كيف أقد أستحمل وجودها قدام عيني طول الوقت كيف.

كيف أتصرف معها الأسبوع الجاي بيرجعون هو وياها من شهر العسل

كيف أتصرف شو أسوي مقهووووووووورة بموووووووت بموت قهر

أخاف أسوي في نفسي شي مو قادرة أستحمل

شو حلولكم خواتي انصحوني بشيء يهدي ناري ويربط على قلبي.