زوجي ينتقص مني ويقلل من قيمتي !!!

 زوجي ينتقص مني ودايما ويقلل من قيمتي !!!

أحس دايمًا إنّي أقلّ منه… أو بالأصح، هو يخليني أحس كذا.

مافي موقف يمر بينا إلا ويطلع منه بكلمة تمسّ كرامتي، تهز ثقتي بنفسي، أو تخليني أرجع أعيد حساباتي في نفسي، كأني فعلًا مو كافية. يتهكّم على طريقة لبسي، على طبخي، على طريقتي مع عيالي، على شكلي… حتى ضحكتي ما تسلم منه. دايمًا عنده تعليق جاهز، ما يمديني أفرح بشي إلا ويردني.

مرة سويت له مفاجأة بكيكة بيوم ميلاده، لبست وتجهزت ورتّبت الطاولة، كلّ اللي قاله: "هذي كيكة؟ ما ودك تتعلمين من أختي؟ تسوي أشياء أفخم."
كأنّي مو موجودة. كأنّي كل اللي أسويه ما يهم.
وإذا قلت له زعلت، يصير أنا الحسّاسة، أنا اللي أعقّد الأمور، يقول: "هذي مزحة، لو تمشين مزحي على نياته، كان انبسطنا."

أيام تمر ما أسمع منه كلمة حلوة. وإذا مدح وحدة قال: "شوفي فلانة كيف تهتم بنفسها، شوفي كيف تتعامل، شوفي كيف تربي عيالها، شوفي كيف..."
وأنا؟ ولا شي.
أنا كأنّي ظل في حياته، أكمّل النقص، أشتغل وأسكت، أتحمّل عشان بيتي وعيالي.
بس بقلبي في تعب. في قهر.
ما أبغى مدح زايد، بس على الأقل أبغى أحس إنّي محترمة، إنّي مُقدّرة.
ما أبغى أعيش حياة كلها إحباط، فيها رجل كل شغله يقصّك عشان ما تقومين، عشان يظل هو الأعلى والأذكى والأكمل.

هل في غيري عايشة بنفس التعب؟ هل كل زوج لازم يجرح علشان يحس إنه رجال؟